（香港文匯報記者 子棠）吳浩康（Deep）最近密密在地盤工作養家，被稱為「職安真漢子」的他亦捱出頭，獲主辦商支持在下月24日元宵節在水上樂園AQUALAND舉行個人演唱會：「主辦單位好錫我，覺得我屬於舞台，所以幫我搞呢次音樂會。我都好多年冇舉行個人騷，今次唔會加太多新Idea，想保留歌曲原汁原味。囝囝會入場睇騷，但唔會上台做『嘉賓』；佢仲咁細個，我都擔心佢會走嚟走去和突然扭計，會唔知點算，唯有扮睇佢唔到，否則要抱住佢唱。」Deep一講到囝囝就冧曬，又指囝囝經常眼定定望着他唱歌。
Deep日前「停工」一天為個唱拍攝海報及宣傳片，並配合現在的身份以一身工業風造型亮相，還出動私夥安全帶拍攝，即使爬上高台拍片唱歌，危坐幾層高鐵架亦毫無懼色。他還落手落腳裝拆欄桿、手法專業：「其實我都擔心有人誤會我做地盤係宣傳，有網民話我響地盤唔駛做、行行企企，我都想問嚇佢有冇呢啲筍工介紹！不過都唔理得太多，明我嘅人自然會明，唔使解釋太多。今次會送飛畀平時出生入死嘅地盤兄弟睇，佢地揀啲歌好大熱所以一定會唱。」Deep坦言一場唔夠喉，盼粉絲買飛打動主辦單位加場。提到網民將張致恆與Deep作比較，他表示都有留意相關消息：「作為佢嘅兄弟，我同大部分人都一樣畀佢呃過，但做朋友就唔會多講，我只想畀佢嘅家庭同成長留翻啲空間。」
責任編輯： 木羽
贵公网安备52011302005168号